ЯНГИ ДУНЁ www.yangidunyo.org янги дунё www.yangidunyo.com

Саҳифаларимиз

Филмлар

Ҳамкорларимиз:

Рукнлар

Календар

januari 2013
M T O T F L S
« Dec   feb »
 123456
78910111213
14151617181920
21222324252627
28293031  

  • Олис юртда омон бўлганим басми?

    dilsora fozilДилсора Фозилова

    Олис юртда жонинг омон бўлса бас,
    Маъюс шивирлайди ҳар гал ўша сас,
    Ҳар сафар сиқади кўксимни қафас,
    Олис юртда омон бўлганим басми?

    Бардош қадалганда суягинг қадар,
    Соч юлиб тақдирни қарғасанг нетар?
    Темирдай ”мард она” бўлганинг етар,
    Олис юртда омон бўлганим басми?

    Қўлингдаги титроқ, сочингдаги оқ,
    Бошинг остонада йўлимга муштоқ,
    Ҳеч нима бермадим қайғудан кўпроқ,
    Олис юртда омон бўлганим басми?

    Дуоларинг менинг фаришталарим,
    Омадим, қудратим, жон ришталарим,
    Балолардан йироқ тутганим маним,
    Олис юртда омон бўлганим басми?

    Мен сени соғиндим, кел бугун – дегин,
    Иложин қилгину, ел бугун – дегин,
    Айтилмас илинжлар кўксингда тугун,
    Олис юртда омон бўлганим басми?

    Маҳзур мажнунтолга суянмай беҳол
    Дуодан тўхта-ю, бир бор уввос сол,
    Ўксиб ўтаётган ҳар лаҳзанг увол,
    Олис юртда омон бўлганим басми?

    Ёстиғим ҳам қоғоз, умрим ҳам қоғоз,
    Қалам қитирлатиб ўтар қишу ёз,
    Хаёлим ўғирлар йиғлаган овоз,
    Олис юртда омон бўлганим басми?

    Мен ҳам азобдаман, меҳрингга зорман,
    Ўзим истиқболман, ўзим заволман,
    Кўксим эзиб ётган ғамгин саволман,
    Олис юртда омон бўлганим басми?

    Бебаҳо юртимдан қарзим бор она,
    Кўксим шох нийятлар тўлган кошона,
    Бир нима бермасам оғрик жаҳона,
    Олис юртда омон бўлганим басми?

    ”Иймонинг бут килсин, жонингни омон”
    Суҳбатимиз шундай тугар ҳар замон,
    Ҳар сўзинг мен учун қонун онажон,
    Олис юртда омон бўлганим басми?

    Канада

     

    www.yangidunyo.org

    Published on januari 9, 2013 · Filed under: Дилсора Фозилова;
    Kommentarer inaktiverade för Олис юртда омон бўлганим басми?

Comments are closed.